تالت تراك by hussein elzayt published on 2021-07-18T16:25:42Z تالِت تراك وأنا لسه لم أراك يجوز يكون الأخير يجوز يكون لأ مابطلتش دعاء ليك لكن، الدنيا نازلة فينا رزع ودق نوازل هوازل مهازل وعِدّ يا صاحبي كتير أصحابنا بقا عندهم أولاد وفيه منهم بقى أشطر كتكوت وفيه منهم سَكنوا مصر بنستسهل فنقول ع القاهرة اللي بتعصر عصر إنها مصر القاهرة .. لوحده اسم مخيف مصر بردو اسم لطيف المهم يا سيدي بقوا فران تجارب لشركات التوظيف الرأسمالية مش عاتقانا تيران ف ساقية وبنلف خيري اتجوز! ياااااه شوفت الأيام كنا بنقول ده م الأحلام وأديه اتحقق لو هاندقق هانعرف إن كتير م الأحلام اتحقق إلا إني أشوفك فبقيت أكلم خيالك اطمن منه على ظروفك واسأل منه على أحوالك إسلام.. على حطة إيدك زي الكبريت لا بهزر خطب وبيدور على صنايعية ما هو بردو فيه حاجات اتغيرت أكيد أسامة لسه زي ما هو قلبه يوماتي يزيد حنية علاء بقا أبو زيانا هشام لساه شهيد أهيه دنيا يا صاحبي ومش سايبانا يوماتي فيه جديد ف جديد جارحي ومعتز وزيدان بقوا عرسان لساه حمدان ومنيسي بقت مقابلاتنا ليه بعيدة شقراني بقا عند تميم وطلعت بقا من ساكني المنيا الجديدة تركي بقا عنده ولدين عبَّاقي بقا دكتور أطفال وأنا لسه زي ما أنا حسين بقول كنا وكنا ومكناش اترحمنا على ناس بتموت اترحمنا على ناس ماتت ببلاش اترحمنا على سرمحتنا ف الشوارع والبيوت اترحمنا كمان على ناس عايشة جه وقت وكانوا حبايب زيك أو تحديدًا مش زيك إنت مكانش ومش هايكون فيه زيك كات وشوشهم بتنوَّر، صبحت قبر وعلاقات جديدة دخلناها أخدت م العمر اقعد أحكيلك أخليهم يحضروا لقمة يا ابني هاناكل بالموجود دايت إيه سلمها لربك بلا سعرات بلا كوتش طب تشرب شاي؟ طبعا هاتقولي من غير سكر طب ثانية وجاي خد راحتك البيت بيتك خد باسورد الواي فاي معلش اتأخرت عليك صلي على شفعيك طمني عليك أنا عن نفسي كويس جدًا أو يمكن حتى كويس بس أو يمكن... مش عارف مالي من يوم غيبتك ومحدش داري تقريبا بنخاف نتقابل نتحول لدموع وقنابل ف الأحضان بنتبت جامد بنخاف المرة الجاية ننقص واحد أو حتى اتنين، من يوم تلاتين حساباتنا اختلفت وبقينا أشبه بكآبة مساجين حتى مقابلاتنا من سنة للتانية بقا عندنا قاعدة وحيدة ف وسط الضحك |الله يرحمك يا رجب| وبنسكت ثانية بنعد ف عداد السنوية نتجمع ف البيت تلاتين واحد مش دايمًا بنكون تلاتين واحد نقرأ ف المصحف لحد ما نختملك وندعي ربنا الواحد إنه يغفرلك ويهنيك ويعوض شبابك ف الجنة ونفضل ندعي وندعي ليك وندعي يا رب يصبر أبوك ونفضل نهزر ونضحك أخوك وعم رجب بيصمم مانروحشي غير واكلين كإننا ف واجب والمفروض إننا يا دوب بنسد الدين كام مرة على إيدك اتجمعنا نتعصب ونتشن وإنت بتسمعنا ترمي الإفيه شوف ابن الإيه جبته منين والله ما عارف أنا بعدك يا رجب بقيت خايف اضحك على إفيه غيرك أو اضحك أصلا فيفتكروني إني نسيتك! ف الدنيا حاجات مابتتنسيش ولو حتى ليوم القيامة زي وجودك وضحكك كل حاجة سبت فيها علامة زي ساعات من الأنس "زي مثلاً" "أحمد أسامة" حاجات كتير مع الوقت مش بتتغير أمانة خلي بالك منه أخوك الصغير خده من إيده لجل ياكل تمر ويشرب وقت ما يعوز خمر وإحنا بندعيلكم يبعد عنكم أي حر وجمر وإحنا أهوه راضيين بتعدي بينا سنين ويعدي فينا أنين ولم نزل صابرين شوفت الجمعية بقت جمعية.. أقولك غَيَّر ف السيرة احكيلي عن يومك احكيلي كل تفصيلة قبل اما تكمل معلش هاقاطعك إنت عارفني سؤال وجه على بالي إنت شايفني؟! طب إنت بتسمعني؟ يعني بيوصلك اللي بقوله بتشوف سهري الليل بطوله ما تقوم تمشي آه والله صحيح قوم ما أنا هافضل اتكلم وإنت هاتسمع بس هموم حقك عليا أنا اللي حمار قلبك اللي بوسع مجرة ماتحملش شوية بخار وبقيت يا صاحبي من أهل الجنة قوم ياسطا إيه جابك يومين وهانيجي لجنابك هانلاقيك ف نفس سنك مش هاقاطعك وهاسمع منك هاتقولي احكيلي هاقول حكيتلك هاتقولي جديدك هاقول ف سيرتك هاتقولي واحشني هاقول دي جيرتك هاتقولي احضني هاكلبش رقبتك هاتقول بالراحة هاقول من غيبتك هاتقولي سامحني هاقول .. سامحتك Comment by Osama Awad ربنا يبارك في عمرك يا صديقي ويجازيك كل خير ويدوم صحبة الخير يارب ويجعل من حبك لحبايبك نصيب في كل حاجة في حياتك من فضل ربنا وكرمه 🤲❤️ 2021-07-20T03:19:36Z Comment by C Abdo Shokrany تسلم ايدك ودماغك علي الكلام الجميل دا 2021-07-19T14:37:27Z Comment by C Abdo Shokrany ربنا يرحمك يا قلبي ❤️😍 2021-07-19T14:35:25Z Comment by M.Seif اللهم ارزقنا صحبة ك حسين 2021-07-19T00:29:23Z Comment by Mohamed Mshref رحمة الله عليه 🤍 2021-07-18T18:55:11Z Comment by IsLam SaLah والله الواحد مش عارف يضحك ولا يعيط ربنا يرحمك يا رجب ويجمعنا كلنا ❤️ 2021-07-18T18:11:15Z Comment by ساهر الله يرحمك يا احمد❤️🙏 2021-07-18T17:00:05Z