published on
سألني الكون في يوم عن أمنيّة يحقّقهالي
مخدتش بالي غير من مكسب اللي جت في بالي
بحكيلك ,, يمكن تلحق قبل ما تتمنى الأمنية
مهما كان مكسبها مغري تدرس أعراضها الجانبية
_______________________________
عدّت سنين وفاتت ,, كان نفسي أموت وساكت
رغم إن أملي نور العتمة في السكوت دا زادت
مشيت طريقي لوحدي ,, شخبطت على الرسمة
متجيش تسألني ليه ,, وأيه أخبار الفكرة ؟ ماتت
قلم و ورقة ,, فاضل زقّة ,, شيل مبقولش لأ
يطلب أنفّذ ,, طاقتي بتنفذ ,, هانت بكرة خلاص تتحقق
بندهني لكن صدى المتاعب بيخلّيني مسمعش
ما اللي بيعدّي نص مسافة ماشيها مبيرجعش
وأديني وصلت ,, واعتبرت تعبي كان بيساعدك
عشان تحققهالي ياريت يا كون تنفّذ وعدك
رد الكون أنا آسف هي اختارت تتحقق لغيرك
مش أنا الحاجة اللي في إيديها تتحكم في مصيرك
متستناش معجزة ,, حاول توصل باجتهادك
إرادتك أملك عملك ,, أنسب قطر يحققهالك
لسه محدّش شاف خيالي ,, ولسه برضه بـأرسم
يمكن مفيش مشاكل ,, مشكلتي الحقيقية ؟ يمكن
_________________________________
اتمنّيت إجابة واضحة رد عليّا الكون بالعكس
إزاي تقدر تخلق أمل للناس من عدم يأس
أدينا بنقرّب خطوة مع محاولة كل جيل
صدقني مهما كان بعيد أصعب هدف مش مستحيل
_________________________________
حاولت أدمج الطرفين ,, فاليقين اعترض
بسبب الشك في احتمال يكون الشك غلط
بدل ما يكون سلاحك ضد الشر ,, درعك غرض
فـتحب العلاج ,, لحد ما تسمع إنه سبب المرض
عشان أفهمه خلقت في عقلي غيره ألف ,, نظام
شايف في كل الناس نوع غريب من الاتصال
رغم شكي بكل طاقتي بأدافع ,, التزمًا
إيجاد دليل دا وعد ليه من اللي بصدق آمن
أكتر حاجة بتشكّكني وبتخليني أحب ,, ربنا
إنه صابر عليّا وأنا مستعجل أعيش في حاجة غير هنا
أصلي مراعي احتماليّة كون الواحد مختلف ,, بس أنا
مش قادر أعيش في نسبة ,, رغم إن الناس متأقلمة
هفضل مستني إجابتك على سؤالي ,, إنت أيه ؟
أكّدلي بس طريقك ,, مهما كان طويل همشيه
قلبي في كل مرّة يختارك ,, وأنا باختار قرار العقل
بأدرس أبعاد كتير ,, ملقتش عند غيرك عدل
- Genre
- Wishing