سِيدَا _ منّة كردى _ أحمد السعيد by Menna kordi published on 2018-10-04T18:18:49Z أداء صوتي : منّة كردى https://www.facebook.com/mennakordii كلمات : أحمد السعيد https://www.facebook.com/ahmed.elsaeed.1865 هندسة صوتية : منة كردى الكلمات : -"وحشتنى" شيلت الخناجر من قفص صدرى وفتحته للهوا ورجعت لاختى بسخريه قلتلها "انتى اوحش" -"طمنى فاضل قد ايه؟" -"لأ لسه...مَبعدّش" وإيديا واحده بتعدل الهيدفون والتانيه شرطى غشيم بيكتم بوق قلبى عشان ماتطلعش الحقيقه فى لسه فاضل ٦٧٢ يوم وست ساعات ونُص وكام دقيقه . فى حاجات غلط من ضمنها *كِدب اللى قالوا القُرب بالنيّه *خوفكو عليا من انى اجوع ..خافو.. م الاكل وحديّا *كون اللى قبلى خانهم التعبير فقالو "كل الحاجات المؤذية ف الغربه قادره" كان قصدهم كل الحاجات القادرة مؤذيّه . "يا مسافر وحدك" مش بس أغنيّه . أنا وِشّى حَجّر م التصنّع ف الصور وعنيا لمّا قلبى زغلل شُفتها بتدُق كل الحاجات -بيقولو - حلوة اشمعنا انا فتّحت عين شباك أوضتنا الصبح خفت بجد شافو القصور والسيارات والروشنه وانا شفت خرسانه وناس "هى كالحجارة أو أشد" هما اللى صح..اتمتعوا بالراحه والجو النضيف وانا قروى ساذج ماتبسطّش لما بدّلت القهاوى بالمولات والناصية بالتكييف . وبيسألو ايه اللى ممكن يكسرك ف الغربه دى وانتا ابن شتل الرز والسوق والعتاله؟!! قلت.. الكفاله الشبشب الباغه العبيط طيب و "السيفتى" قاسية ومؤذية جرحت صباع قلبى الصغيّر لما داست بافترا رقاب العماله . نفس المكان بالظبط.. أبرهه لم يموت الفيل بقا العمال واحنا بقينا السوط انا كنت شاعر فى بلاد المرمطه ازاى بقيت جلاد ف بلد القوت . ملّيت صرخت كأنى بيت بتهد "انا احب اقول الشعر ف الحلوين".. محدش رد " أتحبُنى بعد الذى كانَ".. محدش رد "صوتك أرق من النايات" جعلو اصابعهم ف تاتش الأيفونات وانفضّوا من حولى . أمى اللى عبّت شنطتى شافت ان الهدوم والأكل و الشاى والصابون أولى من صوت ابويا وحضنها و عيون كريم ورنا أو ربّما .. -علشان منظلمهاش- خافت من الوزن الزياده وخنقة التفتيش أول لمّا شافت إن ضيق الشنطه ميساعنيش ضحّت بإنى احيا.. ف مقابل انى أعيش . . . هارجع .. لأن الميّه ف الحنفيه لا تصلح هنا للشرب لأ القُرب لازم يتسند بالقرب لأن اخواتى رابطينّى بأستك لم يفكه الغُرب هارجع.. لأن لمصر ريحه وصوت ولون .. وعيون بتستنى العيون لإنى مستحيل اسمح أنقّط حقى ف مراتى .. مكالمات فيديو وعيالى.. صور خلفيه ع التليفون. . ان جيتو للحق بصراحه.. الوضع مش بالحزن دا كان ممكن اكتب نَص أبهج من كدا لكنكم بتميلو أكتر للبكا ولأنكم انتو بكايا.. بميل لكم Genre Soundtrack Comment by محمود الجابي يا ع الجمال 💙💙💙 2023-07-04T12:24:59Z Comment by أحمد شحاته الجميعي السعيد و جماله.. و الأداء المزهل.. عاش جدا 2020-04-05T00:18:54Z Comment by عبدالله محمد الله يا سعيد 2020-02-12T03:01:44Z Comment by Âhmèd Âhmèd مبدعة كالعادة ❤ 2020-01-31T19:13:18Z Comment by Eman Eltokhy الله على ادائك 2019-07-28T03:06:54Z Comment by Elawady Abd-Elkhalek انا سعيد بالأداء ده جدااا احسنتي وابدعتي جدااااااا خصوصا ان القصيدة دي شاعر بجد زي احمد السعيد 2019-05-14T01:21:51Z Comment by Noha Zeida عاش 2019-02-19T18:34:16Z Comment by Menna kordi معنديش يوتيوب للاسف 2018-11-15T23:04:39Z Comment by Mohamed Omar ممكن اللينك بتاع القصيده ع اليوتيوب علشان انزلها ع الفون 2018-11-11T16:38:41Z Comment by Ammar Alaa ابدااااع كالعاده 👏👏❤❤ 2018-10-06T08:38:48Z Comment by Menna kordi ❤❤❤❤❤❤ 2018-10-05T01:18:06Z Comment by Hagar Mazen اتبسط خالص بالتراك بصوتك، جميلة كعادتك 2018-10-05T00:56:27Z Comment by Mahmoud Zeit-har لان اخواتي ربطنِّي باستك لم يفكه الغُرب 2018-10-04T20:04:19Z Comment by Eslam Reda هم الي صح :) 2018-10-04T18:38:03Z