تحت اضواء القاهره - محمد عبد الفتاح by الشاعر محمد عبدالفتاح published on 2016-12-30T18:24:25Z تحت آضواء القاهره في وسط ميدان طلعت حرب كانت حرب الافكار شغاله بشوات بتلملم ضحكات الفقره جنرال بيلملم م البشوات نفس الضحكات فبيرسم ضحكه علي وش بشوش والناس مش عارفه ان تملّي جوة الوش وشوش ........... كانت بتعدي الشارع و بتفرد شَعرها ع الإسفلت و الموكب بيعدي عليه هي بتصرخ هو آصم بيدوس ع الحلم بدون رحمه تحت آضواء القاهرة ف وسط الزحمة بستناكِ تعدي الشارع و تلمي الشَعر و آكتبلِك شِعر يليق بالمشهد و العالم يشهد إني بحبِك أكتر من قهاوي القاهره من حواري السيدة من صوت ميدان الاوبرا من كوبري قصر النيل من حضن قلب الليل بكتبلِك .... و الحبر بينزف خوف زي خوف القهوة و ابطالها زي خوف الطير م الصياد زي خوف غرقان مستني الطوق زي خوف البرج علي المنظر من فوق احساسه بإن الهوا مخنوق من كاميرا مراقبة عين الخلق إحساسه بإن القاهره شايفه الحق و بتداري لفينا حواري القاهره ما لقينا دليل ان الليل بيخاف الضي و ان الحي بيقتل حي و ان الجاي هيكون وردي بصوا في عين القاهره دلوقتي هتلاقوا النيل بيخاف من مركب و القاهره بتخاف من موكب! هتشوفوا حبيبتي اما تعدي ف ايديها الورد إيدها بترعش م الخوف مش م البرد و انا ماسك ايدها و بكتب شعر الشارع شاهد ع المنظر و بيحكي لطلعت حرب حكايتنا و الغرب بيحكي عن الموكب و النيل مبيحكيش للمركب علشان بيخاف! تحت آضواء القاهرة و مليون كشاف مش باين غير الموكب! مش باين طفل بيشقي علشان وكل ابوه مش باين غير اللي يحبوه انا و انتي ازاي مش باينين احنا اللي نحط القوانين و احنا اللي نشيلها احنا اللي بنبعد جداً و ف لحظه نجيلها احنا اللي بنكتب شعر علي جدران القصر ونغني و نرسم احلام طب نَملك ايه الا كلام زي سرب حمام بيخاف ينصاد زي مدفع منغير مدفعجي تحت آضواء القاهره عدينا الشارع و الموكب عدي طلعت حرب بص في عيني قالي احضنها متخافش و بكل، بساطة حضنتك و مخوفتش كان اولي نعيش اللحظه و منبوصش علي هذا الموكب المرة الجايه يا نيل إياك تخاف من مركب! النيل احنا و المركب قهر القاهرة و الموكب مش موكب ريس ده مخطط م الغرب الملعون طلعت حرب هو الريس ركز جداً في المضمون #m7md_3ftah Genre Electronic Comment by Yasmeen Essam اي كل دااا🌸 2019-02-01T01:03:10Z Comment by Noran 👏👏❤😍😍😍😍❤❤❤❤ 2018-01-31T22:43:29Z