الساعة - مصطفى إبراهيم by Mostafa Ibrahim | مصطفى إبراهيم published on 2021-05-30T23:38:00Z Music by : Samer Ashraf ----------------- مين اللي كان موجود قبل أول دقة في الساعة قبل أول نور بأول لون ما يقطع سكتة ف الكون؟ قبل أول بذرة وقبل أول دود وأول واحد ينتهي ويعود وقبل والد المولود اللي خلى الدنيا في جماعة مين اللي كان موجود قبل أول دقة ف الساعة؟ كان الزمان واقف ما فتحش حنفيته؟ ما جرتش حواديته؟ زي مجرى النهر.. اللي اتفتح فجأة ع الفضاء البور لا سور ولا سقف يبني الثواني فوق بعض زي الطوب يبني السنين فوق بعض يبقم تاريخ الأرض اللي كانت تحبي جوَّه الكهف النهارده دراعها واصل المريخ والزمان ماشي لوحده ف ضلمة الأكوان ماشي يقول سبحاني كلها أكواني يا كل شيء تاني بأي شيء غير الثواني نشأت إديني وقت.. وكل شيء ف الدنيا يتحقق وكل شيء مش مصدَّق آخرته يصدَّق ف الجاذبية والزمن والنور وكل حتة صخر مرمية ف الفضا الخالي بيعدي فيها الزمن زينا وبتدور مرمية فيه زي السمك ف البحر مرمية زي السمك في حوض كريستالي الدنيا باينة واسعة من جوَّاه الدنيا واسعة صحيح.. لاكن نظر مش لمس زيك بتسأل هيَّ ليه جت هنا ودي شهادتنا عن الحياة ولا شهادتها عننا زيك بتسأل ع الحقيقة والسراب والذاكرة والانفجار الضخم في السنين الغابرة.. قبل الوجود مين اللي كان موجود قبل أول دقة ف الساعة وقبل أول نور يتولد للشمس؟ ------------ Genre Soundtrack Comment by Mohammed Fathy 58 أول مرة أحس انى قاعد مع نفسي بكلمها من ١٠ سنين. ١٠ سنين بحالهم يا مصطفى 2023-12-11T23:46:13Z Comment by فاطمة بسم الله ماشالله عليك ابهرتني ❤️❤️ 2023-01-02T08:59:28Z Comment by فاطمة لو كتبت روايات بجد هكون اول واحده اشتريها وادعمك حقيقي يجي منك سيناريوهات وروايات بجد مفكر شيفاك مفكر اكتر من شاعر 🙏🏻 2023-01-02T08:59:09Z Comment by الدرويش الصغير شنهاي 😂 2022-10-24T14:44:06Z Comment by azwaany ربك 2021-12-23T15:36:20Z Comment by ali g3fary ❤❤❤❤ 2021-08-21T03:53:50Z Comment by user365628631 ايه العظمة دي ❤️ 2021-07-22T14:17:31Z Comment by samer ashraf🎺 انا فخور اني انا اللي عامل المزيكا دي ♥️♥️♥️♥️🥺🥰 2021-07-19T02:23:42Z Comment by fatma∆ عظمه ❤️ 2021-06-20T23:21:32Z Comment by Ahmed Mefrh ❤️ 2021-06-05T04:03:19Z Comment by Ashraf Shawky Alrassoul الله عليك يا درش، كلماتك تحرض على التفكير كالعادة، لمصطفى محمود حلقة بعنوان "لغز الزمن" مرتبطة جدا بهذه القصيدة - عاش يا درش 2021-06-04T10:08:36Z Comment by Nada Khaled ما قولنا منسألش الاسئلة الوجودية دى يا كلاوى 2021-06-01T06:14:57Z Comment by mahmoud الأرض اللي كانت تحبي جوَّه الكهف النهارده دراعها واصل المريخ 2021-05-31T17:04:41Z Comment by Tod Shealey it's realy cool! i like it! 2021-05-31T01:12:15Z Comment by أحمد هشام اديني وقت.. وكل شيء في الدنيا يتحقق ❤️ 2021-05-31T00:01:53Z