لفحة حنين | سوزان عماد by Suzan Emad El-Deen published on 2022-05-21T19:21:16Z فات قد إيه.. والروح بتنشع ف اشتياق والحب ناشِف ولساني سافف وحدته ناسي حروف كلمة "حبيب" وعينيا رافضة الشوف وحاضنة ف السواد ومبقّيالك مطرحك دافي وقَريب وازاي هشوف الضي وانت نن عيني وانت اللي خدت القلب من جُب الألم علمته يعرف يبتسم وتسيبه يرجع ينقسم ويعود غريب .. "مستنياك يا روحي بشوق كل العشاق" مع إني شوفتك وقتها بتفك إيدك من إيديا وسمعت حِسك وانت بتقولي الوداع وبقول يجوز ميهونش على قلبك يفوتني في الضياع ومن الأكيد القسوة مش هتطول أوي وتعود تخضّر قلبي وتهدهِد حنينُه وتلملم الشوق اللي متبعتر على الاعتاب وتحلّي ريقي من أسى ومُر الغياب.. فات ييجي ألف نهار وانا وحدي من فَجرهم مستنياك ع الباب لا فيه أمارة مبيّناك هاتعود ولا عارفة إني أرضى بالموجود واللي فضِل مبقاش يكفّيني.. لولا ان ريحتك لسه ف هدومي "ودموعي ف غيابك دوا عيني" يادي السنين اللي بتكويني.. وملازمة روحي حد باب القبر يا قهرة القلب اللي صبر و ما نال ومفيش ف إيده غير يكمل صبر ومفيش ف إيده م الفَرَح نايب.. غايب، وسايبني ف جوف الموت قلبي صبح كومة أسى، جلدي مكرمش م الجفا عمال بيتنشّأ على لمسة إيدين بيني وبينك في الوصال .. غفوة بيني وبينك في الفراق ... عمرين!! تعرف .. انت الوحيد اللي ف حياتي عمري ما عجزت افهمه لكني بستغرب قساوته المرة دي بقا سهل عندك ترمي روحي ف وِسط نار! وتغيب عن القلب الوحيد اللي فتحلك نفسه دار وانت اللي عارف حالي بَعدك يبقى إيه وانت اللي عارف يعني إيه الانتظار.. وازاي بَعِد الوقت وبيصعب عليا والشوقة بتجرّح عينيا والثانية ف غيابك بقت مشنقة .. يا غربتي في السهد والليل الطويل "يا طول حنيني من هنا"..... لحد اللقا!! #سوزان_عماد Comment by Esraa Maged قمر اوي ماشاءالله 💙💙🦋 2022-06-03T23:40:52Z Comment by Mo Ka جميل اووي بجد الله 💜 2022-05-21T21:50:44Z